夏天到要搵件好料啱身形嘅淨色圓領短袖tee真係難過乜。

前年佐記有，重係「齋弗」。不過一如所有「齋弗」，一吸汗啲汗就跟死件衫一世，點洗都洗唔甩浸味。

美國出品KIRKLAND夠白又夠厚，洗足一季仲可以捱到下季，好過「慳屎」得一年命。

Global warming低下，夏天嘅tee要比從前薄先叫與時並進，又薄又柔軟，非AA莫屬。

圓領短袖tee心口加個袋叫做有啲嘢，今個夏季，我行AA制。

玩完mountain bic轉玩road bic，玩過road bic就唔會玩番mountain bic。

初頭坐上架軚幼幼嘅「茄能」dale上面左搖右擺甩吓甩吓以為搞唔掂，點知家陣越踩越大癮，總之見路就行。

天矇光出車嘅好處係前面冇車，一來一回都係自己由頭帶到尾。

真係自己由頭帶到尾？

自己同自己踩原來係有啲自己呃自己嘅成份。好彩間唔「屎」(其實係時時)會俾其他車手過吓頭，嗰陣就會知道自己其實有幾慢。

工作一樣。

幻想Macy Gray加Norah Jones，柔化剛發，剛柔相濟，咁仲得了？要起雙飛就搵阿Rae！

Corinne Bailey Rae，係禮拜音樂嘅不錯選擇。

聽就包冇死，睇埋live就俾佢嚇死，仲以為佢播帶夾咀形，夾到滴水不漏，查實貨真價實現場真功夫。

舞唔識跳，不過自彈兼自唱，最利害把聲贏晒。

星期日朝早嚟個Corinne Bailey Rae，希望在明天。

開騷前要拜神祈求演出順利，我要拜幾個神。

篇幅有限，不能盡錄，當中包括有Billy Crystal同Andy Rooney。

睇奧斯卡為咗Billy捱六十分鐘因為Andy。有時幻想變成Billy Crystal企上台一開場表演十零廿分鐘，然後順手頒埋獎，最好自己攞埋，一唔係就好似Andy Rooney咁對住鏡頭表演齋噏三四分鐘，一噏到老都唔錯。

「A」for維園阿伯，「B」for是但噏，「A」「B」餐任揀。

去迪士尼太遠，不如嚟石景山樂園。

較早前石景山樂園事件令我諗起中國畫家岳敏君。

扯到去岳敏君身上，除咗因為石景山樂園事件有岳敏君作品「笑大人個口」嘅特徵之外，奇在連面色都一樣。

樂園裏面有個粉紅面白雪公主，岳敏君作品裏面嘅跨張大人頭又何嘗唔係個個紅粉菲菲。

石景山其實同岳敏君一樣，用偶像褻瀆偶像，從而令世界變得更加有趣。

按摩係呢個「摩」，咁自己同自己按摩應該可以叫做「自摩」，其實都可以係「自摸」，我係自摩愛好者，閒時都會上下其手，自摩三番。

呢舊嘢，四隻腳，mood傢伙？木造，朋友送，初頭以為裝飾，兒童玩具，放响枱面年幾未郁過，有日身痕攞嚟玩吓，玩吓玩吓就碌吓碌吓，一碌不可收拾，舒服到死，先至發現原來佢係一個按摩器。

家陣成為我自摩時常用嘅玩具。

市面上有大量不同質地版本，不過呢個木做兼有眼有咀就好少見，香港或者有都未定，唔知，靠你自己去摩吓。

「腦作」到塞塞地嘅時候，最好搵啲唔關事嘅嘢撞吓，咁就自然腦輕鬆。
查實上網都可以搜尋到佢嘅料，不過話明要開腦，懶得睇字就梗係整隻DVD。
「大」導演Sydney Pollack 嘅documentary主角係畢爾包古根漢博物館嘅建築設計師Frank伯。呢位接近八十歲嘅阿伯，件件作品奇形怪狀，烏喱單刀，用料奇特，靚仔騎呢集於一身，總之黐黐地話知理。最啱嗰啲個腦塞塞哋，索佢兩啖即刻成個通晒。

香港已經有好多出色設計嘅建築物，但係如果可以有一件阿Frank嘅簽名式作品，衝擊一吓都未嘗不可，如果唔係就真係平平無「奇」。